Alba Rozas
Naceu en Lalín, en 1988. É editora, investigadora, escritora e docente. Licenciuouse en Filoloxía Galega e Filoloxía Hispánica pola Universidade de Santiago de Compostela. En 2020 defendeu a súa tese Fragmentos de Apocalipsis como ficción espacial: la condición contrafactual de Villasanta de la Estrella. Un análisis desde la cartografía literaria. Na actualidade, exerce de profesora lectora de galego na Universidade de Salamanca. Forma parte do podcast galego Baleiro Perfecto de fantasía e sci-fi. Publicou o relato ‘A dama do corazón negro’ (A rebelión de Prometeo. Contos Estraños, 2017) e o libro A caída de Guiomar (Contos Estraños, 2020) que inauguran o xénero da fantasía épica galega. Tamén é a autora dos relatos ‘Costureiriña cosida’ (Contos do Sacaúntos. Romasanta o vagabundo. Fundación Vicente Risco, 2020), ‘A culpa é das sereas’ (Aña. Fanzine de (des)identidades femininas de Bueu, 3, 2021), ‘Alí quedou, coa cabeza nun bidón’ (Revista Inviable, 15, 2021) e ‘Tomasa Bárbara’ (Contos do Sacaúntos. Romasanta o segador. Fundación Vicente Risco, 2021).
-
A caída de Guiomar
14,00 €Tras un século baixo a protección da raíña Guiomar, as terras de Eabaca vense ameazadas pola aparición dun monstruoso cabalo e a chegada da Orcavella, unha criatura cun poder tal que ninguén lle pode facer fronte. Só cando a pandeireteira Aima decide acompañar a guerreira Tegra na súa viaxe polas catro parroquias do reino, a esperanza volve agromar. Non obstante, a súa misión non será doada, pois mouros, nubeiras, xans, luciñas e xente cativa terán que unir forzas se queren conservar a liberdade.
-
Lapislázuli. O regreso das superguerreiras
18,00 €Nun mundo escindido entre a maxia e a tecnoloxía, feiticeiras e feiticeiros caciques gobernan co pretexto de salvagardar a xente do común dunha praga centenaria de robots asasinos. Non obstante, só as depositarias das pedras de poder, cinco mozas convertidas en superguerreiras, demostraron ser capaces de erradicar semellante ameaza. Malia que desapareceron sete anos atrás do fragor da batalla, deixando escapar o inimigo, será certo que agora están de volta? Arrasarán por fin cos robots? E o máis desconcertante de todo: que fai un robot disfrazado de vaqueiro?
Lapislázuli. O regreso das superguerreiras camiña entre os eidos do new weird de China Miéville, da fantasía épica de Robert E. Howard, Emily Rodda ou Andrezj Sapkowski e, sobre todo, do sentai de Akira Toriyama e do mahō shōjo de Naoko Takeuchi.
-
O androide Simón
12,00 €O androide Simón ten a súa casa no planeta anano Plutón, pero quere viaxar a outros lugares para pasar uns días de vacacións. Por iso irá percorrendo os diferentes planetas do sistema solar e tamén as súas lúas e aneis na procura daquel que máis lle guste. Queres saber como son os planetas e onde decidiu quedar o androide? Mergúllate nesta aventura chea de sorpresas.
-
O biosbardo e os paxaros sen cor
12,00 €Cando o biosbardo pasou a pita do monte, a pega, o picapeixe, o verderol… e até sete paxaros quedaron sen cor! Queres saber como son e o que argallou o biosbardo? Mergúllate nesta aventura chea de sorpresas.
-
O tesouro do caranguexo
12,00 €O caranguexo da pinza de ouro é o dono dun gran tesouro feito de cunchas. Non obstante, fáltanlle sete para que estea completo. Por iso falará coa ameixa, a vieira, o berberecho, o longueirón, a ostra, a zamburiña e o mexillón. Queres saber como son as súas cunchas e se logrou completar o caranguexo o seu tesouro? Mergúllate nesta aventura chea de sorpresas.